Edhe Kina e sheh me shqetësim zgjerimin e NATO-s. Ministria e Jashtme kineze, në një deklaratë zyrtare, tha se zgjerimi i NATO-s në rajonin e Azi-Paqësorit do të dëmtojë stabilitetin.

“Zgjerimi i vazhdueshëm i NATO-s drejt lindjes në rajonin e Azi-Paqësorit dhe ndërhyrja e aleancës në çështjet rajonale do të dëmtojnë në mënyrë të pashmangshme paqen dhe stabilitetin”, tha zëdhënësja e Ministrisë së Jashtme kineze, Mao Ning, e cituar nga TASS.

E pyetur për planet e NATO-s për hapjen e një zyre në Japoni, ajo tha se Azia “nuk duhet të bëhet arenë e rivalitetit gjeopolitik”.

Sipas saj, përparimi i NATO-s në Azi do të lehtësojë konfrontimin e bllokut.

“Kjo duhet t’i shqetësojë veçanërisht vendet e rajonit,” vuri në dukje ajo.

Më 3 maj, japonezja Nikkei raportoi se NATO po planifikon të hapë zyrën e saj ndërlidhëse në Japoni vitin e ardhshëm. Sipas gazetës, “stacioni do të lejojë aleancën ushtarake të kryejë konsultime periodike me Japoninë dhe partnerët kryesorë në rajon si Koreja e Jugut, Australia dhe Zelanda e Re”. Vendimi zyrtar pritet përpara Samitit të NATO-s në Vilnius më 11-12 korrik.