Me shumë padurim është pritur nga populli miratimi në lexim të dytë Projektligji për Byronë Shtetërore për verifikimin dhe konfiskimin e pasurisë së pajustifikueshme.
Kjo Byro do t’ia kthejë shtetit dhe shoqërisë pasuritë e përvetësuara padrejtësisht ndër vite.
12 vjet përpjekje për ta jetësuar këtë Byro u bënë sot realitet me Qeverinë Kurti.
Miratimi i këtij projektligji së bashku me 33 amendamente shtesë, u bë në seancën e së enjtes në Kuvendin e Kosovës. 66 deputetë votuan për, asnjë kundër dhe asnjë nuk abstenoi.
Përveç deputetëve të Lëvizjes Vetëvendosje, mbështetje i dhanë edhe deputetët opozitarë të Lidhjes Demokratike të Kosovës. Ndërkaq, Partia Demokratike e Kosovës paralajmëroi se të njëjtin do të dërgojnë në Gjykatën Kushtetuese.
Ministrja e Drejtësisë, Albulena Haxhiu, tha se qëllimi i projektligjit nuk është që të goditet ndonjë zyrtar publik, por vetëm pasuria e pajustifikueshme e cilido prej tyre.
“Nuk është qëllimi që të goditet një zyrtar, por qëllimi është që të luftohet pasuria e pajustifikueshme e kujtdo qoftë zyrtari”, tha ajo.
Ndryshe, deputetët votuan edhe Projektligjin për ndryshimin dhe plotësimin e ligjeve që kanë të bëjnë me racionalizimin dhe zhvendosjen e vijave llogaridhënëse të agjencive ekzekutive.
