Ballina Blog Faqe 3

BE vendos kufizime të reja ajrore nga shqetësimi i variantit të ri Covid – Çfarë dimë deri më tani për B.1.1.529 nga Afrika Jugut?!

Një variant i ri i COVID-19, B.1.1.529, i cili është përshkruar se ka një “profil të tmerrshëm të mutacionit spike”, është gjendur në një numër rastesh të koronavirusit në Afrikën e Jugut.

Shqetësimi për variantin e ri është numri i lartë i mutacioneve, të cilat mund ta ndihmojnë atë të shmangë mbrojtjen e trupit. Është pikërisht ky numër i lartë i mutacioneve, që besohet të jetë të paktën 32 për momentin, që po ngre shqetësime në lidhje me aftësinë e tij për të shmangur vaksinat dhe për t’u përhapur me lehtësi.

Shqetësimet për të kanë shkaktuar kufizime të reja të udhëtimit në Itali dhe Gjermani të Premten, ndërsa Brukseli po mendon një ndalim fluturimi në mbarë BE-në.

Komisioni Europian do të propozojë pezullimin e udhëtimit ajror nga Afrika Jugore mes shqetësimeve për variantin, tha të premten presidentja e KE Ursula Von der Leyen. Gjermania dhe Italia kanë njoftuar tashmë masa për të kufizuar udhëtimin ajror nga rajoni.

Roma ka ndaluar hyrjen në territorin e saj për këdo që ka qëndruar në Afrikën Jugore “gjatë 14 ditëve të fundit”, njoftoi Ministri i Shëndetësisë Roberto Speranza, duke kërkuar “masë paraprake maksimale” përballë variantit të ri.

Vendet e prekura nga kjo masë janë Afrika e Jugut, Lesoto, Botsvana, Zimbabve, Mozambiku, Namibia dhe Eswatini, tha ministri.

Berlini tha të premten se do të kthej mbrapsht udhëtarët e huaj nga Afrika e Jugut.

Jashtë BE-së, Britania e Madhe dhe Izraeli kanë njoftuar tashmë kufizime të udhëtimit për rajonin e Afrikës Jugore mes shqetësimeve për variantin e ri.

Ju pëlqen!

A është mamaja juaj më e ngrohtë me nipërit dhe mbesat sesa me ju? – Studimi: Fajësoni biologjinë!

E keni parasysh atë lidhje të veçantë që nëna juaj duket se ka me fëmijët tuaj? Atë që ajo nuk duket se e ka me askënd tjetër – madje as edhe me ju? – Ju nuk po e imagjinoni këtë por është mjekësisht e mundur, sipas një studimi të ri.

Ndryshe nga primatët e tjerë, njerëzit mbështeten tek njëri-tjetri për të ndihmuar në rritjen e fëmijëve të tyre dhe shpesh ata pasardhës bëjnë më mirë kur kanë të rritur të tjerë, si gjyshet e tyre, të përfshirë në jetën e tyre, tha autori kryesor i studimit James Rilling, profesorë e antropologjisë, psikiatrisë dhe shkencat e sjelljes në Universitetin Emory në Atlanta. Rëndësia e gjysheve mund të gjurmohet neurologjikisht, sugjeron ky studim.

Studiuesit zbuluan se gjyshet që u shfaqeshin imazhe të nipërve të tyre biologjikë kishin një përgjigje neurologjike në zonat e trurit të tyre që janë të rëndësishme për ndjeshmërinë emocionale dhe motivimin. Studimi, i publikuar nga revista Proceedings of the Royal Society B, punoi me 50 gjyshe që raportuan se kishin marrëdhënie pozitive me nipërit e mbesat dhe nivele të larta të përfshirjes me ta.

Gratë iu nënshtruan imazhit të rezonancës magnetike funksionale (fMRI), e cila mat ndryshimet në rrjedhën e gjakut që ndodhin me aktivitetin e trurit, ndërsa u tregohen imazhet e nipit të tyre, një fëmije tjetër që nuk e njihnin, një të rrituri që nuk e njihnin dhe prindit të të njëjtit gjini me nipin e tyre. Për disa ai ishte fëmija i tyre biologjik, dhe për të tjerët ishte nusja ose dhëndri i tyre.

Më shumë reagim emocional për nipërit dhe mbesat

Studimet kanë ekzaminuar funksionet e trurit të nënës dhe babait në të kaluarën, por kjo është një nga vështrimet tona të para se si truri i një gjyshe reagon ndaj nipërve të tyre, tha Rilling. Disa gjetje nuk janë befasuese: gjyshet treguan më shumë përgjigje kur shikonin nipërit e mbesat e tyre sesa fëmijët që nuk i njihnin, sipas studimit.

Është interesante se gjyshet treguan aktivitetin e trurit të lidhur me ndjeshmërinë njohëse më shumë kur shikonin fëmijët e tyre biologjikë dhe nuset apo dhëndrit sesa nipërit e mbesat e tyre. Kur shikonin nipërit e tyre, ata treguan ndjeshmëri emocionale më të fortë sesa me fëmijët e tyre.

“Ndjeshmëria emocionale është ndjenja e emocioneve që një person tjetër po ndjen. Empatia njohëse është të kuptosh se çfarë po mendon apo ndjen dikush dhe pse,” tha Rilling.

Kjo mund të nënkuptojë se ndërsa gjyshërit ishin të prirur të kërkonin të kuptonin ndjenjat e fëmijëve të tyre të rritur, ata janë më të përshtatur për një përgjigje emocionale kur bëhet fjalë për nipërit e mbesat.

“Jo vetëm që tregon se truri i gjysheve aktivizohet kur bëhen të tillë, por gjithashtu tregon se zonat e trurit të prindërve aktivizohen vonë në jetë, ose ndoshta gjithmonë të aktivizuar. Një herë nënë, gjithmonë nënë,” tha Paëluski. “Kjo mbështet dhe zgjeron atë që të tjerët kanë raportuar kohët e fundit në atë që ka efekte të vazhdueshme të prindërimit në tru deri në plakje.” CNN

Ju pëlqen!

Argumenton e informon Kryeministri Kurti: Siguria, shëndetësia e arsimi, prioritete të buxhetit të vitit 2022

Kryeministri i Republikës së Kosovës, Albin Kurti duke iu drejtuar deputetëve të Kuvendit të Republikës së Kosovës, tha se po e mbyllim vitin me një rritje ekonomike rreth 10% dhe me një rritje të të hyrave prej 33%, që janë rezultat i qeverisjes së mirë dhe besimit të qytetarëve në institucionet e vendit.

Për herë të parë po e votojmë një buxhet, që është tërësisht i yni, që ka ndarje buxhetore për projekte të maturuara e me qëllime zhvillimore, që ngërthen në vete një plan të ringjalljes ekonomike që ndihmon ata që janë prekur më së shumti nga pandemia dhe fuqizon gratë e prodhimin vendor, një buxhet i cili sigurinë, shëndetësinë e arsimin i ka prioritete, tha ai.

“Puna e mirë ka filluar dhe do të vazhdojë deri në fund të mandatit”, përfundoi fjalën e tij Kryeministri i Republikës së Kosovës, Albin Kurti.

Në seancën e sotme plenare, Kuvendi i Republikës së Kosovës miratoi në parim buxhetin prej 2 miliardë e 748 milionë euro për vitin 2022.

Fjala e plotë e Kryeministrit të Republikës së Kosovës, Albin Kurti:

Të nderuar deputetë të Kuvendit të Republikës,

Të nderuar ministra të kabinetit qeveritar,

Dje kishim mbledhjen e 45-të të Qeverisë së Republikës së Kosovës, ndërkaq pardje janë mbushur tetë muaj që jam në detyrë, me ç ‘rast janë marrë 394 vendime deri më tani dhe mund të them se Ekonomia e vendit asnjëherë nuk ka parë rritje ekonomike më të lartë sesa në vitin 2021. Do ta mbyllim këtë vit me një rritje ekonomike rreth 10% dhe me një rritje të të hyrave prej 33%. Të dyja këto si rezultat i një qeverisjeje të mirë dhe besimit të qytetarëve në institucionet e vendit, e veçanërisht për Qeverinë.

Vitin që po lëmë pas e gjetëm me borxhe e me projekte të dëmshme për vendin:

– kemi anuluar vendimin për shpronësimet në autostradën e Dukagjinit, segmenti Kijevë-Zahaq, e cila sipas raportit të auditorit doli se kishte fryrje të çmimeve;

– kemi gjetur ndarje buxhetore nëpër projekte kapitale të pamaturuara në një kohë pandemie e në anën tjetër shkurtime buxhetore pikërisht për institucionet shëndetësore, si SHSKUK e Ministria e Shëndetësisë – mungesë buxhetore për barna esenciale;

– kemi gjetur një program të rimëkëmbjes ekonomike, i cili ka ndihmuar pikërisht ata që janë prekur më së paku nga pandemia; e të tjera të ngjashme.

Mirëpo, për herë të parë po e votojmë një buxhet, që është tërësisht i yni. Një buxhet, i cili ka ndarje buxhetore për projekte të maturuara e me qëllime zhvillimore, që ngërthen në vete një plan të ringjalljes ekonomike që ndihmon ata që janë prekur më së shumti nga pandemia dhe fuqizon gratë e prodhimin vendor, një buxhet i cili sigurinë, shëndetësinë e arsimin i ka prioritete.

Në mënyrë specifike, buxheti për vitin 2022 do të jetë 2 miliardë e 748 milionë euro kurse të hyrat buxhetore do të arrijnë vlerën prej 2 miliardë e 364 milionë euro. Kemi ndarë 388 milionë euro në kategorinë “Paga dhe Mëditje”, 285 milionë euro në “Mallra dhe Shërbime”, 873 milionë euro në “Subvencione dhe Transfere”, 556 milionë euro në “Shpenzime Kapitale” dhe në “Shpenzimet Komunale” kemi ndarë 19 milionë euro.

Për sa i përket projekteve specifike, pra ato që reflektojnë Programin tonë Qeverisës:

Kemi bërë studimet falas për të gjithë studentët, dhe do të ndajmë edhe 2 mijë bursa shtesë për ata më të mirët. Me këtë buxhet do të mbështesim shkencën e hulumtimin.

Kemi shtuar 35 milionë euro tek pensionet dhe skemat sociale, ashtu që asnjë pension të mos jetë nën 100 euro, dhe shtesa për skemat sociale prej 30% të bëhet e përhershme.

Kemi shtuar edhe 24 milionë euro buxhet shtesë për sigurimin e barnave esenciale.

Për herë të parë kemi buxhetuar mbështetje për Luginën e Preshevës, në shumë prej 2 milionë euro.

Kemi ndarë 50 milionë euro për të paguar borxhet e shpronësimeve që kemi trashëguar, ashtu që më në fund të mund të kryhen rrugët që tashmë janë në proces për shumë vite.

Me këtë buxhet, ne do të fillojmë ndërtimin e 50 çerdheve në tërë vendin, që fëmijët të kenë kujdesin e duhur, e gratë të integrohen në tregun e punës.

Me këtë buxhet, ne kemi ndarë 45 milionë euro për të mbështetur nënat përmes pagesës për të gjitha lehonat dhe për shtesat për fëmijë.

Kemi ndarë 20 milionë euro për skemën e punësimit të garantuar për të rinjtë, dhe do të mbështesim bizneset startup dhe ato në teknologji informative.

Për herë të parë, kemi ndarë 10 milionë euro për blerjen e ambasadave në shtetet aleate.

Kemi rritur buxhetin për bujqësinë në mbi 70 milionë euro për herë të parë, dhe me grantet e donatorëve, mbështetja totale do të rritet edhe më shumë.

Prodhuesit vendorë do t’i mbështesim me 40 milionë euro, për të zgjeruar kapacitetet, për të rritur cilësinë dhe për të gjetur tregje për eksport.

40 milionë euro tjera i kemi ndarë për të financuar investimet në ndërmarrjet publike, në Trepçë e Telekom, ashtu që këto asete të kthehen në gjenerues të mirëqenies.

10 milionë euro i kemi ndarë për pajisje moderne për Policinë dhe Zjarrfikësit dhe 10 milionë për rezervat shtetërore, të cilat në njërën anë shërbejnë si treg për prodhuesit vendas, ndërkaq në anën tjetër e imunizojnë ekonominë tonë nga fluktuimet e çmimeve në bursën ndërkombëtare.

Ushtrinë e kemi projektin tonë madhor, andaj për herë të parë kemi ndarë buxhet prej mbi 100 milionë eurosh, apo 1.3% e Bruto Produktit Vendor (BPV) dhe synimi ynë është që brenda mandatit ta sjellim në 2% të BPV-së, aq sa e kërkon standardi i NATO-s.

Përveç ndarjeve buxhetore, të cilat kanë për fokus forcimin e sigurisë së vendit, avancimin e arsimit e përmirësimin e sistemit të shëndetësisë, projektligji për vitin 2022 ka edhe disa risi sa i përket menaxhimit të mirë të financave publike dhe ruajtjes së stabilitetit makrofiskal, për të cilat Ministri i Financave, Punës dhe Transfereve ju informon detajisht përgjatë kësaj seance të sotme plenare.

Tek tani po e vërejmë se sa ka vuajtur shteti ynë për një qeverisje, që nuk keqpërdorë dhe nuk abuzon me paranë publike. Për një qeverisje, që synim parësor ka zhvillimin e qëndrueshëm ekonomik të vendit, e si rezultat ngritjen e mirëqenies qytetare.

Puna e mirë ka filluar dhe do të vazhdojë deri në fund të mandatit.

Pra, pardje i kemi mbushur tetë muaj dhe kemi sjellë vendime për gjithsej 90 projektligje dhe padyshim që optimizmi dhe shpresa që kemi ne në krye të institucioneve dhe atë që e kanë qytetarët, i kontribuon edhe aspektit socio-ekonomik të vendit tonë.

Ju faleminderit.

Ju pëlqen!

Sot mbahet mbledhja e përbashkët qeveritare Kosovë-Shqipëri, këto janë disa nga marrëveshjet

Të premten e 26 nëntorit në Elbasan do të mbahet mbledhja e përbashkët, e shtata me radhë e Qeverisë së Republikës së Kosovës dhe Qeverisë së Republikës së Shqipërisë.

Disa marrëveshje pritet të nënshkruhen në këtë mbledhje.

Por, ato që tashmë janë bërë të ditura, janë marrëveshja për sigurime shoqërore, ku është kërkuar autorizimi për nënshkrim nga Presidentja e Kosovës, Vjosa Osmani, marrëveshja për lejet e qëndrimit në afat 5-vjeçar, përmes një aplikimi të thjeshtë dhe ajo për lehtësimin e procedurës së njohjes së diplomave.

Po ashtu Ministrja e Arsimit, Shkencës, Teknologjisë dhe Inovacionit, Arbërie Nagavci në një prononcim për media ka bërë të ditur se marrëveshja në fushën e arsimit do të jetë për lehtësim të procedurës së njohjes së diplomave.

“Marrëveshja që do te nënshkruhet në fushën e arsimit është: Marrëveshje dypalëshe për lehtësimin e procedurës së njohjes se diplomave nga IAL-te (të konfirmimit të të diplomuarve nga Qendrat Kombëtare respektive të Njohjes së Diplomave). Në fushën e njohjes dhe njësimit reciprok të diplomave, certifikatave dhe gradave shkencore, të lëshuara nga institucionet e arsimit të lartë dhe institucioneve të tjera të autorizuara”.

Do të nënshkruhet edhe një memorandum mirëkuptimi për studimin e fizibilitetit për ndërtimin/rehabilitimin e segmentit hekurudhor Durrës-Prishtinë.

Po ashtu pritet të ketë edhe marrëveshje në fushën e sigurisë.

Të gjithë qytetarët e Kosovës do të mund të marrin lejen e qëndrimit në afat 5-vjeçar së bashku me lejen e punës në Shqipëri, vetëm me një aplikim të thjeshtë.

Kështu ka bërë të ditur ministri i Brendshëm i Shqipërisë, Blendi Çuçi duhet shtuar se kjo do të nënshkruhet të premten në takimin e përbashkët të mes dy vendeve.

“Sot, miratuam një nga marrëveshjet që do të nënshkruajmë të premten mes Shqipërisë dhe Kosovës që ka të bëjë me lejet e qëndrimit të shtetasve respektiv. Është lajm i mirë për shtetasit e Kosovës që do të marrin thjesht me një aplikim lejen e qëndrimit për 5 vite në Shqipëri dhe brenda saj edhe leja e punës”, ishte shprehur Çuçi.

Po ashtu, gjatë fjalës së tij, ai ka lënë të kuptohet se do të ketë edhe të tjera marrëveshje brenda sektorëve që përfshinë Ministria e Brendshme.

“Është lajm i mirë edhe për shqiptarët që jetojnë në Kosovë që do të marrin leje qëndrimi me procedura të thjeshtuara. Është në vazhdën e disa marrëveshjeve që do të nënshkruajmë brenda sektorëve që përfshin Ministria e Brendshme”, ka shtuar ai.

Ministri i Financave, Punës dhe Transfereve, Hekuran Murati gjatë mbledhje së Qeverisë së Kosovës ka deklaruar se kanë përfunduar me sukses negociatat për marrëveshjen për sigurime shoqërore.

“Bëhet fjalë për të kërkuar rekomandimin për autorizim për nënshkrim nga Presidentja e Kosovës lidhur me marrëveshjen për sigurime shoqërore në mes të Qeverisë së Republikës së Kosovës dhe Qeverisë së Republikës së Shqipërisë. Qeveria e Kosovës e përfaqësuar fillimisht nga Ministria e Financave, Punës dhe Transfereve ka përfunduar me sukses negocimin e marrëveshjes për sigurime shoqërore në mes të dy qeverive. Objektivi kryesor i kësaj marrëveshje është sigurimi i mbrojtjes shoqërore për qytetarët që jetojnë në të dy shtetet duke u mundësuar atyre të realizojnë të drejtat e tyre, siç janë pensionet e moshës, pensionet familjare, pensionet invalidore të punës si dhe e drejta në pension nga fondi i kursimeve pensionale individuale, apo shtylla e dytë”, tha gjatë mbledhjes Murati.

Tutje, Murati shtoi se me këtë marrëveshje qytetarëve që kanë punuar një kohë të gjatë në Republikën e Shqipërisë do tu mundësohet që pas arritjes së moshës së pensionimit të kenë të drejt që këtë pension ta marrin në Kosovë.

Ju pëlqen!

Festa identitet 28 Nëntori: Rast për gëzim apo zhgënjim

28 Nëntori erdhi! E në këtë ditë të madhe retorika po lulëzon, fotografia e bukur po dominon. Shumë nga ne po gëzon e po feston. Me të drejtë, me vend dhe kështu edhe duhet të jetë.

Por, unë mendoj tjetër, ndoshta më ndryshe…

Sa më përket mua, mendoj se këto vite i kemi shfrytëzuar shumë keq. Shqipëria dhe shqiptarët vazhdojnë të mbeten një nga vendet më të varfra të Evropës. A nuk të gjakon zemra, e, a nuk të dhemb shpirti kur shef nëna me fëmijë në gji, pikërisht me 28 Nëntor, e bash në ditën e Flamurit, të arratisen e të ikin nga vendi e Shqipëria e tyre!

Loti nuk të lejon të shohësh qartë familjet shqiptare duke pritur në rresht për të ikur (paramendo, përmes Serbisë) për të shpëtuar… nga varfëria, poshtërimi e jonjerëzia!

Shqiptarë, këtu e atje, në vend e në mërgim,

Na mbyti ende injoranca dhe mungesa e racionalitetit. Klasa jonë drejtuese është bërë gazi i botës. Nuk kemi sinqeritet e as pastërti në mes veti. Shqiptarët dhe dheu i tyre vazhdon të jetë i ndarë midis Shqipërisë, Kosovës, Serbisë, Maqedonisë, Greqisë e Malit të Zi. Edhe atë pak territor që na ka mbetur, po e përdhunojmë ditë për ditë, e si mos më keq.

Të jem i drejtpërdrejtë: Sot s’ka asgjë për t’u gëzuar. Sot ka më shumë arsye e vend për hidhërim, pezëm e lot. Zhgënjim!

Me dhembje në zemër e me shpirt, si asnjëherë të mallëngjyer, uroj që kjo festë të shërbejë për të menduar, se ku jemi pas këtyre vitesh pavarësi si komb, e si njerëz para se gjithash. Ku kemi ndërmend të shkojmë si shqiptarë, me cilat vlera?

Kam frikë se nesër kjo ditë do të jetë veçse një rast tjetër për” fotografi” e për reklamë mediatike, rast për të valëvitur flamurin kuqezi nga “patriotët” e degjeneruesit të këtij kombi e të këtij vendi.

Nokë, biri im, gëzuar 28 Nëntori!

Luftëtarë të tradhtuar e të poshtëruar, gëzuar 28 Nëntorin, festën jozyrtare të flamurit kombëtar në Kosovë.

(Shkruar më 2014)

Ju pëlqen!

“A është fajtor Shqiptari”, poezia epike nga Esat Mekuli

A është fajtor Shqiptari

A është fajtor shqiptari pse në këtë qiell jeton,
nën këtë qiell në trojet e të parëve të vet ?
A është fajtor pse është,
e përkundër të gjithëve qëndron shqiptari,
rob e njeri, që do i vetvetës të jetë ?!

A është fajtor shqiptari, pse si të tjerët don
të jetojë si njeri në të vetat sot e përditë ?
A është fajtor pse, përkundër dhunës – rron e qëndron
nën qiellin e Kosovës loke, në truallin e të parëve të vet!

Esat Mekuli (Sat Nokshiqi)

Ju pëlqen!

Mesazh motivues për çdo femër që po lufton me kancerin nga një luftëtare, e cila që ia doli mbanë

“U operova në vitin 2015, kisha kancer gjiri. Kisha shumë frikë, por doja të shkoja vetëm në operacion. Gjithçka shkoi mirë, mirëpo meqënëse i kisha lënë pas dore, siç më thanë mjekët, ishin zhvilluar dy tumore. Dy sarkoma malinje, njëra djathtas dhe tjetra majtas. Për atë djathtas nuk kisha ndjerë asgjë, ndaj ndoshta mund ta besoj se isha me vonesë. Gjithsesi nuk kisha çfarë të bëja. Duhet ta pranoja realitetin tim. Nëse diçka të bie për pjesë, nuk të mbetet gjë tjetër veçse ta pranosh dhe të vazhdosh përpara. Nuk ke zgjedhje tjetër.

Në sallën e operacionit, ndërsa isha shtrirë, i kërkova kirurgut të bënte një kontroll të mirë. Nuk doja më të përballesha me një traumë të tillë sërish në të ardhmen dhe për këtë gjë arrin të më kuptojë vetëm dikush që ka kaluar një tumor. Ndien një stres që nuk mund të përshkruhet me fjalë, por në fund të operacionit kisha vetëm një synim. Të arrija të paktën moshën 80 vjeçare.

Askush në familje nuk kishte ndërruar jetë në moshën 80 vjeçare, unë do të isha më e vogla do të konsiderohesha si më pak luftarakja. Mendoj ndonjëherë nënën time, e cila hante, pinte duhan, pinte alkool, nuk shkoi ndonjëherë te dentisti, dhe ndërroi jetë në moshën 99 vjeçare. E konsideroj veten me fat që kam kaluar kancer në moshë të madhe, sepse kur mendoj për femrat më të reja që po përballen me këtë armik të tmerrshëm dhe janë në gjendje të rëndë, më vjen tmerrësisht keq. Përpiqem t’i ndihmoj, të bëj gallata përpara tyre dhe kjo ndonjëherë i ndihmon, por e di se thellë brenda vetes ato vuajnë pamasë, ashtu si unë dikur. Iu them të gjitha femrave se jeta është shumë e shtrenjtë. Mos u dorëzoni. Ju meritoni të jetoni. Mendoni për ata që ju duan, nuk e meritojnë t’ju humbasin kaq herët”. – Mara Maionchi

Ju pëlqen!

“Që ta kuptosh dikë, duhet ta vendosësh veten në vendin e tij”. Kjo histori do t’ju prekë pa masë

Historia e mëposhtme është reale, autori ka preferuar të mbetet anonim. Bëhet fjala për një fëmijë, i cili me kalimin e viteve rritet. Kur ishte i vogël, ai mërzitej me të atin se e gënjente shpesh, kur ndërkohë i ati nuk i mbante premtimet jo se nuk donte, por sepse vonohej shumë në punë. Djali nuk e kuptonte, pasi nuk e dinte realisht se si funksiononte puna e një kamionisti (siç ishte i ati). Këtë gjë ai e kuptoi vetëm kur u rrit dhe filloi punën edhe ai vetë si kamionist. Për më shumë, mund të lexoni historinë e mëposhtme.

“Kur isha fëmijë, isha shumë i mërzitur me babanë tim. Një ditë, ndërsa u kthye në shtëpi më herët se zakonisht, më tha:

– Çne që nuk po më përshëndet? Nuk je i lumtur që po më sheh?

– Jo, jam i mërzitur më ty, – i thashë unë.

– E pse? – më pyeti im atë.

– Sepse më thua vetëm gënjeshtra, – i thashë shkurt.

– Gënjeshtra? – ma ktheu ai.

– Po, sepse të kërkova të vije e të më shihje në ndeshjen e futbollit. Dje më premtove se do vije dhe sot nuk erdhe. Më premtove se do ishe i pranishëm në ditëlindjen time, nuk ishe. Më premtove edhe se do shkonim në plazh me xhaxhallarët, ndërkohë vetë erdhe një ditë më vonë nga dita, kur ata do të niseshin me pushime. Pastaj dhe shumë herë të tjera që më ke gënjyer, por që nuk dua t’i kujtoj. Je një gënjeshtar, – iu hakërreva unë.

Ai më mori mbi gjunjët e tij dhe më tha:

– Duhet ta dish se për çdo herë kur të kam premtuar diçka, doja ta mbaja premtimin, por për shkak tëpunës sime nuk ia kam dalë dot ta mbaj. Një kamionist e di se kur niset për në punë, por nuk e di kurrë se kur kthehet nga puna.

– Atëherë ndërro punë, kështu do të jesh më tepër në shtëpi, siç janë gjithë baballarët e shokëve të mi, – i thashë unë.

– Por unë di të bëj vetëm këtë punë. Pastaj, t’i kërkosh një kamionisti të zbresë nga kamioni e të fillojë njëpunë tjetër, është njësoj si t’i kërkosh një peshku të fluturojë. Puna ime është shumë e rëndësishme. Duhet ta kuptosh se ti mund të konsumosh biskotat e preferuara, apo frutat që pëlqen, falë punës që unë bëj.

Më pas ai po me tregonte se sa e vështirë dhe impenjative ishte puna e tij. Më tregoi për gjithë aventurat e tij nëpër rrugë, ditëve, netëve, nga i nxehti në të ftohtë etj. Që nga ajo ditë, im atë m’u duk ndryshe. Nësytë e mi ai dukej si një hero, si një person special. Dhe kështu ia fala gjithë “gënjeshtrat” e tij.

Një mëngjes, ai telefonoi në shtëpi dhe i tha mamit:

– Në orarin e drekës do të jem në shtëpi. Thoji Arnaldos që i kam blerë gjithçka që i duhet për shkollën.

Ishte data 19 shtator dhe në 20 shtator niste shkolla. Ne pritëm, pritëm gjatë atë drekë me tavolinën tështruar. Në shtëpi na sollën një qese plastike me sendet e mia të shkollës dhe me orën e tij, të gjitha tënjollosura me gjak.

Kjo ishte gënjeshtra e tij e fundit. Tani unë jam rritur dhe jam një kamionist. Bëj po të njëjtat rrugë si im atë. Tani e kuptoj se sa e vështirë është të mbash premtime që lidhen me kohën, jo se nuk do, por sepse puna është e tillë që nuk ke një orar fiks se kur mbaron. Tani unë e kuptoj çdo fjalë që im atë më tha, kur isha i mërzitur…”

Ju pëlqen!

A ishte vërtet perandori Neron, ai që i vuri zjarrin Romës?

Natën e 18 korrikut të vitit 64, një zjarr i madh përfshiu Romën, duke e shkatërruar rëndë qytetin për më shumë se 6 ditë. Ai do të mbetej në histori si Zjarri i Madh i Romës, dhe legjenda thotë se perandori Neron, jo popullor tek masat “nisi të këndonte”, ndërsa qyteti po digjej.

Por a ishte vërtet Neroni shkaktar i atij zjarri? A ka ndonjë të vërtetë në këtë histori? Pikëmja tradicionale, thotë se Neroni fajësoi për zjarrin të krishterët, duke nisur kësisoj 3 shekujt e persekutimit romak ndaj tyre.

Asnjë burim parësor mbi zjarrin, nuk ka mbijetuar deri në ditët e sotme. Përkundrazi, ne mbështetemi në rrëfimet dytësore nga historianët romakë Taciti, Suetoni dhe Dion Kasi. Taciti, burimi ynë kryesor i lashtë mbi këtë temë, e dokumentoi rrëfimin e tij rreth 60 vite pas ngjarjes, ashtu si Suetoni.

Ndërkohë Dion Kasi, shkroi mbi të 100 vjet më vonë. Rrefimet e tyre, ndryshojnë në mënyra të ndryshme, duke e lënë të hapur debatin mbi shkaktarin e atij zjarri. U tha se zjarri kishte nisur në dyqanet në tregun e qytetit, që shisnin ato që Taciti i përshkruan si “sende të ndezshme”.

Këto dyqane ndodheshin pranë stadiumit të garave me qerre të njohur si “Circus Maximus”, dhe u përhap me shpejtësi për shkak të disa faktorëve. Së pari, në atë kohë në qytet frynte një erë e fortë. E njohur si Lo Sciroço (Shiroku), kjo erë e thatë me origjinë nga Saharaja, përfshintë Italinë gjatë muajve të nxehtë të verës.

Së dyti, shumë nga shtëpitë e qytetarëve në zonën ku shpërtheu zjarri, ishin shumë pranë njëra-tjetrës dhe të ndërtuara keq kryesisht me lëndë druri, duke siguruar kështu “karburantin” e bollshëm që zjarri të vijonte i favorizuar edhe nga thatësira e verës.

Taciti shkruante se përpjekjet për të fikur zjarrin, u penguan nga bandat e grabitësve dhe zjarrvënësve, të cilët sulmuan zjarrfikësit, duke inkurajuar kështu përhapjen e flakëve. Kur zjarri u vu më në fund nën kontroll, 3 nga 14 lagjet e Romës ishin shkatërruar plotësisht, dhe 7 të tjera ishin djegur gati në shkatërrim.

Zjarri kishte prekur dy të tretat e Romës, kishte vrarë qindra njerëz, lënë pastrehë mijëra të tjerë, dhe shkatërruar një pjesë të arkitekturës më madhështore të Romës, përfshirë Tempullin e Jupiterit dhe Shtëpinë e Vestalëve. Ndërsa në lidhje me Neronin, Taciti pretendon se në atë kohë perandori ndodhej larg, në qytetin bregdetar Antium.

Megjithëse Taciti nënkuptonte se grabitësit, që ndihmuan përhapjen e zjarrit, mund ta kenë bërë atë gjë me urdhër, nuk e thotë direkt se nga mund të kishte ardhur një urdhër i tillë. Ndërkohë, Suetoni dhe Dion Kasi po. Ata besojnë se fajtor për zjarrin ishte vetë perandori Neron.

Pasi ai donte të digjte pjesë të qytetit që nuk i pëlqente, në mënyrë që të mund të ndërtonte më pas një pallat të madh në vend të tyre. Djegia e Romës, nuk dukej të ishte një veprim i huaj për karakterin “impulsiv” dhe “të korruptuar” të Neronit, perandorin e fundit romak të dinastisë Julio-Klaudiane.

Edhe pse disa historianë modernë, kanë nisur ta shohin atë nën një dritë më të favorshme, Neroni mbetet gjithsesi mishërimi i dekadencës dhe shkatërrimit të Romës antike. Perandori shkonte në shtrat me nënën e tij, më pas e vrau atë, së bashku me një numër grash dhe vëllain e tij.

Në fakt, zërat mbi përgjegjësinë e Neronit nisën të qarkullojnë qëkur zjarri nuk ishte shuar ende. Dhe shumë fakte nuk e favorizojnë. Para zjarrit, Neroni shpresonte të shembte një të tretën e Romës, për të ngritur aty një seri pallatesh luksoze të zbukuruara me monumente.

Ai ëndërronte ta quante kompleksin “Neropolis”. Kështu, Roma do të rindërtohej sipas vizionit të tij. Por Senati i hodhi poshtë planet e tij, duke e nxitur tiranin Neron të gjente një mënyrë tjetër, dhe ky ishte zjarri. Kur ra zjarri, Neroni nuk u kthye në qytet, derisa flakët nisën të kërcënojnë edhe pronën e tij, një shtëpi që po e ndërtonte për të lidhur pallatin e tij me kopshtet e Maecenas.

Zjarri nuk mundi të ndalej në kohë, dhe ai dogji si shtëpinë ashtu edhe pallatin e tij. Vetëm në atë moment, Neroni e ktheu vëmendjen tek populli, dhe u kthye t’i ndihmonte romakët. Ai hapi për të pastrehët Campus Martius-in dhe ndërtesat publike të Agripës, madje dhe kopshtet e pallatit të tij, dhe ngriti struktura të përkohshme për të ndihmuar një turmë të varfërish”-shkroi Taciti.

“Furnizime me ushqime u sollën nga Ostia dhe qytetet fqinje, dhe çmimi i misrit u ul në 3 serterca për një sasi prej 9 kg. Por ato akte nuk prodhuan asnjë efekt, pasi qarkullonin kudo zërat, sipas të cilave perandori u shfaq në një skenë private dhe këndoi këngën e shkatërrimit të Trojës, duke e krahasuar fatkeqësitë aktuale me atë të antikitetit”- vijon më tej historiani.

Zërat u shtuan edhe më shumë, kur Neroni ndërtoi një pallat të ri mbi hirin e godinave të djegura. E njohur si “Shtëpia e Artë”, Domus Aurea kishte veç të tjerash një statujë bronzi 30 metra të lartë të Neronit, kopshte, vreshta, dhe madje një liqen artificial.

Për të hequr akuzat ndaj vetes, Neroni ua hodhi fajin për zjarrin të krishterëve, që në atë kohë ishin një pakicë e pambrojtur. ”Talljet e çdo lloji, shoqëruan vdekjet e tyre. Të mbuluar me lëkurat e kafshëve, ata u shqyen nga qentë, u gozhduan nëpër kryqe, apo u dogjën në turrën e druve, për të shërbyer si ndriçues natën”- rrëfen Taciti.

Historiani romak, e pranon se të krishterëve iu ngarkua faji për zjarrin, pasi ata ishin një objektiv i lehtë. Historianët thoshin se të krishterët e hershëm në Romë, besonin se qyteti ishte një “vend i lig”, pasi ata mendonin se shumica e qytetarëve të tij ishin paganë.

Ata profetizuan se qyteti do të shkatërrohej nga një “zjarr i madh”. Dhe ku ra zjarri i madh, shumë të krishterë mund ta kenë konsideruar atë si fillimin e këtij “Gjykimi të Fundit”, dhe për këtë arsye nuk ndihmuan në fikjen e tij.

Ndaj ishte e thjeshtë që Neroni t’ua hidhte atyre fajin. Gjithsesi, nuk dihet nëse Neroni i ka shënjestruar të krishterët për të hequr përgjegjësinë nga vetja, apo nëse ai e shfrytëzoi atë ngjarje tragjike për të nisur persekutimin e tij ndaj tyre.

Për ata që argumentojnë se zjarri nuk mund të jetë shkaktuar nga Neroni, provat ose mungesa e tyre, anojnë disi në favor të tyre. Librat e historisë, nuk përmbajnë asnjë lidhje të drejtpërdrejtë që vërteton se urdhrin për zjarrin e dha vetë Neroni. Gjithçka që kemi janë zëra dhe thashetheme.

Zjarret në kryeqytet, nuk ishin një dukuri e rrallë gjatë muajve të verës. Dhe Neroni nuk humbi vetëm pallatin e tij gjatë zjarrit, por ai hapi dyert për popullin. Plani i tij i ri i zhvillimit urban, ndërtoi shtëpi të reja të bëra me tulla dhe të ndara nga njëra-tjetra, për të parandaluar një tragjedi të ngjashme.

Kjo shpjegon edhe popullaritetin e tij tek njerëzit e zakonshëm të Romës; dhe pakënaqësinë e madhe ndaj perandorit, që vinte kryesisht nga klasat e larta dhe elita qeverisëse. Nuk ka dyshime se Neroni përfitoi nga zjarri që ra në Romë. Cilido që të ketë qenë shkaku i tij, ai përfitoi nga situata për ta çuar më tej agjendën e tij politike, dhe për të vënë në zbatim vizionin e tij për një Romë të re. / History.co.uk – Bota.al

Ju pëlqen!

Histori motivuese: Dikur 19 vjeç, peshonte 144 kg dhe e urrente veten. Sot, zjarrfikës dhe model

Përgatituni që të habiteni teksa do të lexoni se sa shumë kg mund të humbasë një person, nëse e vendos këtë gjë si qëllim në vetvete.

Mund të diskutojmë sa të duam gjithë ditën, ama pamja e jashtme ka një rëndësi të jashtëzakonshme për të gjithë ne. Sado të na bindin që rëndësi kanë karakteri dhe vlerat tona të brendshme, sërish pamja e jashtme ka rëndësinë e vet.

Duke luftuar mbipeshën dhe pasiguritë që në moshë të re, Sam Rouen nga Sydney Australia ishte vazhdimisht i pakënaqur me peshën e tij.

Momenti kur ai vendosi të binte në peshë ishte në moshën 19-vjeçare, kur u peshua dhe pa se kishte shkuar 144 kg. Kjo gjë e motivoi atë të regjistrohej për të konkurruar në “The Biggest Loser”, një shfaqje ku garuesit mbipeshë konkurrojnë për të humbur përqindjen më të lartë të peshës trupore për një çmim në para.

Pavarësisht gjithë dyshimeve, Rouen ia doli mbanë të bëhej fituesi më i ri i shfaqjes. Fitorja ishte një lojë ndryshuese për të. “Unë i dëshmova vetes se mund të bëja atë që kisha menduar.”

Mirëpo Rouen nuk ishte gati të qëndronte thjesht si një statistikë. Mbi 10 vjet më vonë, ai jo vetëm që ka mbajtur peshën, por gjithashtu ka arritur suksese të reja. Ai po habit gjithë ata që e njohin. Ka krijuar një fizik mjaft të mirë dhe është bërë zjarrfikës, madje u shfaq dy herë në kalendarin vjetor të zjarrfikësve të kompanisë së tij.

“Njëmbëdhjetë vjet më parë nga sot, unë qëndrova në një skenë dhe kuptova se isha zotuar për diçka. Ishte një nga herët e para në jetën time që e ndava mendjen për diçka, dhashë gjithçka dhe arrita atë që doja. Edhe sot më pëlqen të vrapoj dhe të stërvitem me vëllain tim. Luaj pak sport për të qëndruar në formë dhe gjithashtu stërvitem në palestër”. Sam Rouen

Rouen shpreson që triumfi i tij personal të frymëzojë të tjerët të arrijnë atë çfarë dëshirojnë. Shpresoj që të gjithë të kenë mundësi të reflektojnë mbi veten e tyre dhe të kuptojnë se sa të mahnitshëm janë, çfarë mund të arrijnë dhe sa vlejnë.

Kjo është një histori suksesi se si një person ka arritur të bjerë kaq shumë në peshë. Edhe ju, nëse vuani nga i njëjti problem, mos e mendoni të paarritshme rënien në peshë. Është plotësisht e arritshme, nëse e ndani mendjen dhe ruani një regjim të rreptë dietetik. Mund t’ia dilni.

Ju pëlqen!

Lajmet e fundit