Shoqata e mërgimtarëve në Berlin po organizon protestë kundër spiunit rus si raportues për Kosovën në KE.

Sipas të dhënave të marra, e të bazuara në burime të institucioneve të sigurisë së Republikës së Kosovës, kandidati rus për raportues për Kosovën ka qenë pjesë e shërbimit të inteligjencës ushtarake të Rusisë, i njohur si GRU, në kuadër të kontigjentit rus të KFOR-it në Kosovë gjatë vitit 2001.

Mirëpo, në këtë kohë dyshohet se ai ka qenë i përfshirë në një skandal, i cili pati përfunduar me plagosjen e tij dhe të një qytetari shqiptar të Kosovës.

Përmes një postimi në Facebook që u bë nga organizata Love EU, bëhet thirrje për të kundërshtuar zgjedhjen e mundshme të ish-pjesëtarit të shërbimit sekret rus, Andrey Kondratyev.

“Të dashur bashkatdhetarë, Duke kundërshtuar zgjedhjen e mundshme të ish-pjesëtarit të shërbimit sekret rus Andrey Kondratyev si raportues për Kosovën në kuadër të Këshillit të Evropës, më 14 nëntor (e enjte), në Berlin, para Bundestagut Gjerman do të protestohet me moton LOVE EU, not GRU #notGRU. Protesta do të fillojë në orën 09:00 në këtë adresë: Deutscher Bundestag: Marie Elisabeth Lüders Haus Adele Schreiber Krieger Straße 1”, thuhet në njoftimin e tyre.

Vlen të theksohet se ndaj zgjedhjes së spiunit rus reagoi edhe ministri i Jashtëm i Kosovës, Behgjet Pacolli, si dhe ish-ministrit të Jashtëm, Enver Hoxhaj. Ata e konsideruan si të dëmshëm për Kosovën zgjedhjen e Andrey Kondratyev në një pozitë mjaft të rëndësishme.