“Të vdesim të lirë, apo të jetojmë si zagarë të lidhur me zinxhir!?”.

Kjo është pyetja qëm ngre shkrimtari dhe analisti nga Shkupi Kim Mehmeti, i nxitur nga vendimet e fundit të qeverisë në Tiranë.

Përmes një postimi në rrjetet sociale, Mehmeti shprehet se, “liria është e vlefshme po aq sa edhe vetë jeta! Dhe duhet t’u kundërvihemi atyre që na duan me trup të shëndosh, e mendje të ‘sëmurë’!”

Ju pëlqen!

Postimi i plotë i Mehmetit:

Mos u besoni atyre që na duan me trup të shëndosh e mendje të ‘sëmurë’!

“Flitet se muaj me radhë do jetojmë të izoluar e të ndarë nga njëri tjetri!? Thuhet se pleqtë nuk do mund të largohen nga shtëpitë e tyre?! Së kufijtë mes ‘Shqipërive’ tona do mbeten të mbyllur muaj me radhë, se do mund të takohemi mes veti vetëm si në kohët e Titos e të Enverit: me leje të veçantë!

Por çka do që të thuhet për jetën tonë në kohë pandemie, një gjë është e sigurt: pas pandemisë na pret lufta me varfërinë! Siç është e sigurte se burrështetasit tanë autokratë dhe hajdutokratë, do donin ta vazhdonin izolimin tonë dhe që të mos kontaktonim mes veti, sepse e dinë se vetëm ashtu, të përballur nga frika ndaj virusit, ne do harrojmë të shkuarën e tyre keq qeverisëse dhe plaçkitëse!

Ku ta dish, mbase edhe mund të ndodh që të kemi vetëm dy zgjidhje: të vdesim të lirë, apo të jetojmë si zagarë të lidhur me zinxhir!? Por sidoqoftë, nuk duhet kurrë harruar: liria është e vlefshme po aq sa edhe vetë jeta! Dhe duhet t’u kundërvihemi atyre që na duan me trup të shëndosh, e mendje të ‘sëmurë’!”

MekuliPress është në prag të mbylljes. MBËSHTETE SOT GAZETARINË E PAVARUR DHE ORIGJINALITETIN E MEKULIPRESS. Kemi shumë nevojë për mbështetjen tënde, i dashur lexues. NA NDIHMO sot të paktën edhe me 1 Euro!