Publicisti Xhafer Shatri ka publikuar sot rrëfimin e Arian Currit nga Strellci i Poshtëm i Deçanit, i cili më 6 prill të vitit 1994 ishte arrestuar nga Policia serbe.

Ai publikoi një pjesë ku Ariani kishte dëshmuar se si policët serb e kishin lidhur për radiatori dhe më pas e kishin rrahur dhe me majë të thikës ia kishin vizatuar në gjoksin e tij kryqin dhe katër “S” cirilike.

Shatri tregon se falë Amnestisë Internacionale, dëshmia e Arianit, do të bëhet, gjithandej në botë, kryerrëfim për mizoritë serbe në Kosovë:

Më poshtë ju sjellim të plotë postimin e publicistit Shatri:

PËR MOS ME HARRU!

Arian CURRI nga Strellci i Poshtëm, komuna e Deçanit, asokohe ishte nxënës i shkollës së mesme. Më 6 prill të vitit 1994, Arianin e arrestoi policia serbe. Se çka pësoi atë ditë Arian Curri, në Stacionin e policisë në Pejë duhet të mbetet përgjithmonë e pashlyer në ndërgjegjen e shqiptarëve.

Falë Amnestisë Internacionale, dëshmia e Arianit, do të bëhet, gjithandej në botë, kryerrëfim për mizoritë serbe në Kosovë:

“… Pastaj më lidhën për një radiator dhe tre oficerë të policisë hipën mbi mua. Njëri prej tyre, pasi ma hoqi këmishën, e nxori thikën dhe, me maje të saj, vizatoi në gjoksin tim kryqin dhe 4 S të alfabetit cirilikë…”

Këto shkronja që janë pjesë e emblemës serbe në flamur e gjetiu kanë këtë përmbajtje: Samo sloga serbina spasava .(Vetëm uniteti serbët i shpëton).