Ish-kryeministri i Republikës së Kosovës, Albin Kurti, ka kërkuar që menaxhimi i pandemisë të bëhet me procedimin e projektligjit anti-COVID, të cilin e ka iniciuar kryetarja e Kuvendit, Vjosa Osmani.
“Zgjidhja ekziston: procedimi i ligjit anti-COVID, të cilin e ka iniciuar kryetarja e Kuvendit Vjosa Osmani dhe të cilin e ka kërkuar vetë Gjykata Kushtetuese para më shumë se tre muajve. Zgjidhja pra ekziston, por këta nuk duan zgjidhje”, tha Kurti përmes një postimi në “Facebook”, transmeton “Zeri.info”.
Kurti u ka bërë apel qytetarëve t’i respektojnë masat për mbajtjen e distancës, higjienën dhe maskat mbrojtëse.
“Andaj, ndërkohë, ruajeni veten dhe njëri-tjetrin, kujtoni porositë tona e udhëzimet e mjekëve: mbani higjienën personale, mbani distancën fizike, mbani maskat mbrojtëse. Le ta forcojmë solidaritetin shoqëror kur Qeveria na e ka dobësuar shtetin demokratik. Përballë paaftësisë së Qeverisë për të qeverisur, le të kujdesemi ne vetë për jetën dhe shëndetin e të gjithëve”, përfundon shkrimi i tij.
