Kryetari i nderit i LDK-së, Isa Mustafa, ka folur për zhvillimet e fundit në Kosovë që kanë të bëjnë kryesisht me menaxhimin e kontestueshëm të pandemisë nga Qeveria Kurti II – që së fundi mori masa të reja antiCOVID-19 derisa refuzoi vaksinat nga Shqipëria.

Prej sot kanë hyrë në fuqi masat e reja antiCOVID-19 të ndërmarra nga Qeveria Kurti II megjithëse numri i rasteve ka qenë në rënie prej disa ditësh.

Por, si i sheh këto masa Isa Mustafa, profesori i ekonomisë dhe ish kryetari i LDK-së?

Ju pëlqen!

Ai shprehet se Kosova tashmë ka një regjim absolut që mund të bëj çfarë të dojë, dhe masat e reja i sheh brenda kësaj fryme represive.

“Para këtij regjimi, jam shprehur prore kundër masave të cilat ngujojnë qytetarët dhe e dëmtojnë ekonominë shumë fragjile [të Kosovës]. Masa të tilla shpërfaqin botëkuptimet e atyre që i sjellin [Qeverisë], pikëpamjet e tyre represive të ushtrimit të pushtetit. Ato nuk japin rezultate, në të kundërtën, krijojnë frikë dhe depresion te qytetarët. Kjo nuk na nevojitet. Por, për këtë kemi votuar!” – i tha Mustafa Periskopit.

I pyetur për refuzimin që Albin Kurti i bëri vaksinave kineze që Shqipëria po i jepte Kosovës, dhe nëse kjo ka lidhje me hatërmbetjet personale të Kurtit me Edi Ramën, Mustafa sërish ishte kritik ndaj Qeverisë.

“Nuk e kuptoj pse vëllezërit tanë në Shqipëri mund t’i përdorin e ne duhet t’i refuzojmë. Nëse Qeveria Kurti vendos të refuzojmë mallrat kineze dhe të zhvishemi nga këto mallra, pjesa dërrmuese e qytetarëve do të mbeten lakuriq, pa rroba të brendshme e pa të jashtme.” – deklaroi ai.

“Ndoshta edhe për këtë kemi votuar në “referendumin” e Albinit dhe Vjosës!” – përfundoi fjalën z. Mustafa.

©MekuliPress/ Ndaje artikullin me familjen dhe miqtë tuaj. MekuliPress mbetet e pandikuar nga partitë politike. FOTO: No copyright infringement is intended.