Kryetari i komunës së Mitrovicës, Agim Bahtiri, më 23 gusht kishte marrë vendim që e diela të jetë ditë pushimi për të gjitha bizneset në Mitrovicë.

Mirëpo, përmes një postimi në “Facebook”, ai sot ka thënë se “koalicioni i fshehtë në Kuvendin komunal të Mitrovicës PDK-LDK” kanë marrë vendim për shfuqizimin e vendimit të tij të mëhershëm dhe të punohet edhe të dielave në këtë komunë.

“Koalicioni i fshehtë në Kuvendin Komunal të Mitrovicës, PDK-LDK, i përkrahur edhe nga disa gulerac të partive që janë në shuarje, kanë marrë vendim në Kuvendin Komunal që të punohet të dielave në Mitrovicë. Unë jam në kontakt me Ministrinë e Administrimit të Pushtetit Lokal, që ky vendim i dëmshëm për qytetarët nga Kuvendi Komunal të anulohet si i paligjshëm”, ka shkruar ai.

Por, në qoftë se MAPL-ja lë në fuqi “vendimin e koalicionit LDK-PDK” për të punuar të dielave, Bahtiri thotë nuk do të ketë mundësi refuzimi të tij sepse kështu do të bënte shkelje ligjore.

“Të gjithë këtyre që për inati politike kanë marrë dhe po marrin vendime në dëm të qytetarëve, do t’ua kallxojmë vendin në zgjedhjet e ardhshme sikurse më 2013 dhe 2017”, ka thënë Bahtiri.