"

Mbi fatin e mërgimtarëve nuk munden të hartohen ligje pa mërgimtarët

 

Përgjigjeje për z. Dren Zeka, Këshilltar kryesor politik i Ministres

 

Ministria e Administratës Publike

 

Qeveria e Republikës së Kosovës

 

I nderuar zotëri! z. Dren Zeka,

 

Ju falënderohem për letrën tuaj dhe për përpjekjen tuaj që të përgjigjeni në çështjet që i kam shtruar në letrën time publike, drejtuar Ministres znj. Edita Tahiri .

Nga përgjigja e juaj e pash se pajtohemi së bashku me atë sa ju përket shkaqeve dhe motiveve pse regjistrimi i popullsisë në Kosovë është shtyre nga viti 1981 e deri me 2011.

Të them në fillim se nuk e kam të qartë pse përgjigjen e nënshkruani ju , pasi supozoj se Ministrja znj. Edita Tahiri, din shkrim-lexim. Për këtë nuk po ju fajësoj juve, sepse ju keni bërë detyrën që ju ka dhënë Ministrja znj. Edita Tahiri, apo qeveria. Prandaj edhe kjo përgjigje e imja nuk ka të bëj me juve, por me Ministren, znj. Edita Tahiri dhe me qeverinë!

 

- Së pari të them se në letrën time nuk jam marr me  zgjedhje të çështjeve të mija personale, por me çështje që janë me interes nacional. Natyrisht se regjistrimi i popullsisë ka të bëjë edhe me  interesat e mija personale e familjare, si pjesëtar të këtij populli. Prandaj ju sugjeroj që atë ta analizoni edhe një herë.

 

- Fjala është për 1/3 e popullit shqiptar që është në mërgim me punë, andaj edhe

- kufizimi kohor prej 1 deri me 15 prill 2011 është jo real dhe me tendenca negative për Kosovën, andaj atë duhet ndryshuar sa ju përket mërgimtarëve.

 

- Mërgimtarët mund të regjistrohen me një afat të zgjeruar e fleksibil brenda një viti, kur ata vijnë në pushim ose përmes të internetit.

 

Desha t'ua bëj me dije se përfundimisht duhet ta heqni nga mendja se mërgimtarët mund të trajtohen në mënyrë arbitrare, imponuese, burokratike e diskriminuese si deri me tani. Ata janë pjesë e kombit dhe atdheut dhe i kanë të njëjtat të drejta dhe përgjegjësi në shtetin e vet.

 

Mbi fatin e mërgimtarëve nuk mund të hartohen as të zbatohen ligje pa mërgimtarët.

 

- Prandaj, edhe propozova që të hapet diskutimi mbi krijimin e Ministrisë për Integrim Kombëtar dhe të Ministrisë për Emigracion të cilat do të merren me të gjitha çështje specifike rreth integrimit kombëtar dhe emigracionit. Ndoshta do të jetë e detyrueshme që mërgimtarët, në të gjitha shtetet ku punojnë, të organizohen në një Subjekt (parti) Politik që të marrin fatin në duar të veta që më të mos lejojnë të  shfrytëzohen e të diskriminohen si deri me tani nga partitë politike brenda vendit!

 

Më duhet të them se në këtë përgjigjeje të ministrisë tuaj nuk morra përgjigjeje të qarta për çështjet e shtruara në letrën time!

 

Të them menjëherë se është pritë dhe pritet nga kjo Ministri që të emërojë ata që janë përgjegjës, nga përbërja e kaluar e Ministrisë së Administratës Publike, pse u shty regjistrimi nga 1999 deri me 2011. Ata  sabotator të sjellën para përgjegjësie juridike e politike dhe ndaj tyre të ndërmerren masa që së paku kurrë më të mos kenë rast të vazhdojnë me diversione të tilla. Në të kundërtën edhe pse kjo ministri e kjo qeveri aktuale nuk ka faje, do të bëhet bashkëpjesëmarrëse në përgjegjësinë e tyre!

 

Duhet ta dini se:

 

- detyra e parë e çdo shteti është regjistrimi i popullsisë, sepse vetëm atëherë dihet gjendja e përgjithshme dhe  numri i banorëve me të drejtë pjesëmarrje në zgjedhje e votime si dhe përqindja e votave të fituara te secilit subjekt ;

 

- detyra e dytë pastaj është organizimi i zgjedhjeve të lira demokratike,

 

- Subjekti që i fiton zgjedhjet merr mandatin legal edhe për hartimin e akteve juridike

 

- të cilat pastaj i miraton populli në referendum.

 

Kështu  do te kemi një rrjedhje normale të funksionimit të shtetit.

 

Kjo nuk ka ndodh në Kosovë prandaj, nuk ka as legjitimitet të mirëfilltë të mandatit të institucioneve dhe as të akteve që këto institucione i kanë sjell dhe miratuar vet, pa pjesëmarrjen e popullit dhe nën trysninë e sundimit të huaj. Kjo tregon se institucionet dhe liderët e pas 1999 nuk kanë qenë serioze dhe kompetentë (në mungesë të regjistrimit dhe zgjedhjeve legale) për të realizuar detyrat e veta ndaj shtetit dhe popullit.

 

Pos temës së regjistrimin të popullsisë, unë i kam shtruar edhe disa çështje konkrete që kanë të bëjnë me këtë Ministri  e këtë Qeveri dhe natyrisht se secila nga ato kërkon përgjigje konkrete. Do të kishit bërë mirë që ato çështje konkrete të trajtohen publikisht në Kuvendin e Kosovës, me që ato mund të zgjidhen.

 

Sepse më tutje nuk duhet të  lejohet

 

-          anarkia e plaçkitja e tillë e administratës  për nxjerre të dokumenteve personale,

-           plaçkitja e mërgimtarëve nga mafia e sigurimeve të automjeteve, për automjete me sigurim të paguar ndërkombëtar dhe

-          mbi kontrollin e çmimeve plaçkitëse të agjencive turistike që është kah ndodh me lejen dhe pjesëmarrjen e shtetit.

 

A dini ju se sa i kushtojnë të gjitha këto plaçkitja një familjeje mërgimtare? A jeni ju të interesuar që mërgimtarët të kenë sa më pak interes për të ardhur dhe për të investuar në vendin e vet? Apo anasjelltas?  Ku qon kjo politikë diletante shkurtpamëse? Andaj duhet ndërmarr masa urgjent që kjo gjendje të ndryshon.

 

- Konkretisht taksat plaçkitëse për nxjerrjen “urgjente” të  dokumenteve për mërgimtarët duhet anuluar në tërësi dhe zyrat për mërgimtarë të funksionojnë me urgjencë si në kohën e UNMIK-ut kur kjo taksë nuk ka ekzistuar fare.

 

- Bandat e mafisë së plaçkitësve e sigurimeve për automjete të mërgimtarëve, me sigurim të paguar ndërkombëtar, duhet të hiqet nga doganat menjëherë. Sepse me këtë po shkelet e drejta ndërkombëtare e komunikacionit dhe të drejtat e njeriut! Ky diskriminim nuk bëhet ndaj automjeteve të Serbisë që hynë në Kosovë, por bëhet vetëm ndaj mërgimtarëve shqiptarë!

 

- Që çmimet e biletave të udhëtimit të mafisë të plaçkitësve agjencive turistike të vihen në kontroll, që ato të jenë me standardet evropiane. Sepse më shtrenjtë kushtojnë biletat për Kosovë apo nga Kosova për në vendet e Evropës, se sa biletat për të shkuar në SHBA. Shteti e di mirë se si duhet me u sjell me ata që i thyejnë rregullat e tregut të lirë dhe që kalojnë në anarki!

 

Lirimin e biletave të udhëtimit duhet kushtëzuar me dhënien e licencave dhe me ngritjen tatimeve. Shteti duhet ve rregulla që biletat familjare, të më shumë se dy personave të ulen në 50% të çmimit, që në këtë formë të shpeshtohen vizitat e mërgimtarëve sepse ata  kështu sjellim më shumë investime dhe  i lidhin fëmijët e vet më shumë me atdheun e vet.

 

Shteti duhet ta dije se çfarë interesi ka nga gjenerata e ardhshme e mërgimtarëve! Ose rinia mërgimtare do të ia kthen shpinën Kosovës dhe do të asimilohet! Pra, fjala është për interesa strategjike madhore.

   

Ju në tërë letrën tuaj me çështjen regjistrimit të popullsisë merreni vetëm një herë kur thoni:

 

“...Ministrja znj. Edita Tahiri, gjatë takimeve që ka realizuar lidhur me çështjen e regjistrimit e ka deklaruar vullnetin e institucioneve të Republikës së Kosovës për të pasur një regjistrim të standardeve ndërkombëtare, por ka theksuar çështjen e mërgatës, si specifikë e shtetit tonë të ri dhe si pasojë e rrethanave nëpër të cilat ka kaluar vendi ynë...”.

 

Së pari, regjistrimi i popullsisë nuk ka pse të varet nga “standardet ndërkombëtare”, sepse po supozojmë se më nuk jemi koloni e UNMIK/EULEX-it, por vend që deklaron se është shtet i pavarur. Pra, “standardet ndërkombëtare” mund të merren si variantë e mundshme, por jo si të domosdoshme e si diktat!

 

Ju thoni se “...Lidhur me këtë, në plotësim ndryshimet e Ligjit për Regjistrimin e Popullsisë , i cili pritet të miratohet nga Kuvendi së shpejti, është paraparë që fletëregjistrimit t’i bashkëngjitet një listë suplementare, në të cilën familjarët në Kosovë deklarohen për anëtarët e familjes që jetojnë jashtë vendit. Kjo është parë si një zgjidhje e pranueshme për rrethanat specifike të Kosovës, pa shkelur standardet ndërkombëtare...”!

 

Deri kur më me diktatin e “standardeve ndërkombëtare” për çështjet që i përkasin vetëm jetës së brendshme të Kosovës!? Deri kur më me mentalitetin e robit?

Ky “...plotësim ndryshimet e Ligjit për Regjistrimin e Popullsisë..” në vend se t'i regjistrojë mërgimtarët si anëtarë të familjeve brenda vendit, ai parasheh që  “... familjarët në Kosovë të deklarohen për anëtarët e familjes që jetojnë jashtë vendit...”! Ndërsa për serbët kolonistë vlen e kundërta! Ata mund të regjistrohen në Kosovë edhe nëse kurrë nuk kanë qenë në Kosovë!

 

A nuk është kjo vazhdim i tentativave për zvogëlimin e numrit dhe për pastrimin etnik të shqiptarëve, të filluar në kohën e Serbisë. Ai që e ka hartuar këtë “plotësim” me siguri se nuk është shqiptar, por ndonjë minoritar ose ndërkombëtar pro sllavo-grek! Kjo është një zgjidhje e pa pranueshme për rrethanat specifike të Kosovës, dhe i shkel rënd standardet e të drejtës  ndërkombëtare! Sepse askund në botë nuk mundet një shtet të heq dorë nga 1/3 e popullsisë së vet dhe atë t´u imponon shteteve tjera, siç po provohet me këtë Ligjit për Regjistrimin e Popullsisë, i cili ku me ditës se me çfarë manipulimesh serbe ka ardhur me paketë të Ahtisarit në Kosovë.

 

Në të vërtet ata që qëndrojnë  pas kësaj strategjie  të nxitjes së gabimeve të pushtetit përmes këtyre padrejtësive  ndaj mërgimtarëve, synojnë shkëputjen e njërës nga gjymtyrët  kryesore të mbrojtjes,   të mbështetjes sociale, ekonomike, politike, diplomatike dhe patriotike që ka Kosova në mërgim dhe që Kosova  dhe kombi në përgjithësi sërish  të varen nga tjerët edhe më shume se sa është e varur deri me tani.  Të ju përkujtoj se që nga  Gjergj Kastrioti, e Ismail Qemaili e deri te pjesa dërmuese e  UÇK dhe për UÇK, kanë ardhur nga mërgimi për të bërë shtet Shqipërinë, andaj mërgimtarët nuk kanë me lejua që Kosova sërish të fundoset në sundimin  kolonial të “standardeve ndërkombëtare” të Brukselit apo kujtdoqoft! Këtu nuk është fjala për “folklor patriotik” por për interesa ekzistencial të kombit ton!

 

Unë bëra përpjekje që të komunikoj me respekt me këto institucione aktuale, ashtu çfarë janë, me gatishmëri që të bashkëpunojë në të mirën e përgjithshme, sepse konsideroj se vendi ka nevojë për angazhimin e secilit shtetas të vet. Gjuha ime mundet të është pak sa e ashpër, por është e sinqertë dhe drejtë. Mbase kjo do të ndikojë në zgjimin nga amullia e improvizimit  të  shtetit, dhe që më në fund seriozisht të merremi me bërjen e shtetit ton për popullin dhe ton e jo si ju konvenon armiqve të popullit ton. Besoj se me këtë angazhim publik jam duke dhënë kontributin tim, dhe se kjo është mbështetja e ime më e mirë e këtij procesi.

 

Me konsideratë të lartë!

 

Abdullah Prapashtica

29/07/2010